پارلامەنت ءماجىلىسىنىڭ دەپۋتاتى باقىتجان بازاربەك عىلىم جانە جوعارى ءبىلىم ءمينيسترى ساياسات نۇربەككە:
– دۇيسەنبى كۇنى الماتىدا جەر سىلكىندى. جاقىندا سەيسمولوگيا ينستيتۋتىنىڭ عىلىمي قىزمەتكەرلەرىمەن كەزدەستىم. ءىس جۇزىندە اتالعان ينستيتۋت قىزمەتكەرلەرى بەيشارانىڭ كۇنىن كەشىپ وتىر. ەشقانداي عىلىمي جوبالارى قابىلدانباعان. جوبالارىن مينيسترلىككە جولداسا دا، ولاردى كەرى قايتارىپ جاتىر، ياعني قارجىلاندىرۋدى قىسقارتىپ تاستاعان. ءقازىر سەيسمولوگيا ينستيتۋتى توتەنشە جاعدايلار مينيسترلىگىنىڭ قاراماعىندا. سەيسمولوگ عالىمدار ينستيتۋتتى عىلىم مينيسترلىگىنە قايتارۋ كەرەك ەكەنىن ايتىپ وتىر. وسىعان نە ايتاسىز؟، – دەگەن ساۋال تاستادى.
ساياسات نۇربەك كەزىندە ءبىرقاتار ينستيتۋت سالالىق مينيسترلىكتەردىڭ قۇرامىنا بەرىلگەنىن راستاي وتىرىپ، ۇسىنىستى قۇپتايتىنىن جەتكىزدى.
– سەيسمولوگيا ينستيتۋتى دا توتەنشە جاعدايلار مينيسترلىگىندە. ولاردا ءقازىر تولىققاندى قارجىلاندىرۋ بولماعانى وكىنىشتى. سونىمەن قاتار، ءبىزدىڭ مينيسترلىك تە ولاردىڭ ىشكى پروسەدۋرالارىن قولداي المايدى. سوندىقتان اتالعان ينستيتۋت بىزگە قايتارىلسا، قارسى بولمايمىز. ءبىراق بيىل قوماقتى گرانتتى سەيسمولوگيا ينستيتۋتىنا ءبولىپ وتىرمىز، ياعني 3،5 ملرد تەڭگە سوماسىندا. ءقازىر ولاردىڭ بارلىق ءوتىنىمىن پىسىقتاپ، ۇكىمەت جانىنداعى كوميسسيانىڭ قاراۋىنا شىعارىپ وتىرمىز»، – دەپ جاۋاپ بەردى مينيستر.
